JAMITA MINGGU JUBILATE

JAMITA MINGGU JUBILATE

MAROLOPOLOP MA TU DEBATA

(1 Kronika 16 : 31  36)

Hita na hinaholongan ni Tuhan Jesus Kristus,

Marlas ni roha jala marolopolop ima na niigil jolma di ngoluna ganup tingki. Alai ndada holan jolma na mangigil manang mangidohon asa sai marlas ni roha jala marolopolop ngoluni ni jolma i. Debata pe, disosohon do di hataNa marhite angka naposoNa asa marlas roha jolma i tarlumobi angka na porsea. Situasi las ni roha dohot olopolop i do na gabe situasi di turpuk on. Na marlas ni roha jala marolopolop do Daud dohot luhutan halak Israel ala nunga boi sahat poti parpadanan ni Jahowa tu bagasan undungundung na dipadiri di huta ni si Daud. Di ngolu partondion ni bangso i, poti parpadanan ima tanda hadirion ni Debata di ngolu nasida. Poti parpadanan ima poti na badia ongon tanda asi ni roha ni Debata tu bangsoNa. Nian nunga tung ganjang dipardalanhon poti parpadanan i, pola do sahat poti parpadanan i tu luat ni halak Pilistin. Alai marhite pandonganion ni Debata, margogo do Daud rap dohot bangso i mamboan poti i mulak tu Israel jala boi sahat tu undungundung na dipadiri di huta ni si Daud. Ido umbahen marlas ni roha jala marolopolop Daud dohot sandok bangso i, ima situasi na gabe latar belakang ni turpuk on. Di bagasan las ni roha dohot olopolop i ma diendehon Daud ma songon hataridaan ni las ni rohana i mandok mauliate tu Debata. Jala bagian ende las ni roha i do nuaeng turpuk on.

Di hita na hinaholongan ni Tuhan Jesus Kristus,

Molo tajaha turpukta on, ima bagian ende olopolop ni Daud tu Debata, boi do idaonta pigapiga hal na gabe parsiajaran dohot sipahusorhusoronta, ima:

Parjolo, dihirim Daud do asa ndada holan jolma na naeng marolopolop, alai nasa na tinompa ni Debata ingkon do marolopolop. Olopolop na universal jala menyeluruh, i do olopolop na ingkon tubu di adopan ni Debata. Molo marolopolop jolma, ingkon do dohot marolopolop ma nian saluhutna angka pangisi ni portibi on. Ngolu na marolopolop ndada holan gabe jolma na marnampuna disi, alai ingkon dohot do angka na humaliang ima angka na tinompa ni Debata marolopolop. Isi dari nyanyian pujian Daud ini mengajarkan kita dan seluruh orang percaya agar sukacita yang dirasakan haru juga dirasakan oleh alam sekitar karena bisa juga menikmati dan menyaksikan karya baik Allah bagi alam. Melalui apa alam bisa menikmati karya baik Allah? Melalui kehidupan manusia yang hidup dalam konsep Allah, yaitu menjadi gambar dan rupa Allah di dunia ini. Panghirimon ni Daud di endena on gabe parsiajaran na arga na mengkoreksi sikap ngolu ni jolma na so perduli di angka na humaliangna molo marolopolop ngoluna. Isarana: molo dipatupa jolma ulaon las ni roha manghamauliatehon pasupasu di ngoluna, godang do jolma i na lupa manjagahon haiason ni lingkungan, dohot angka parange na asing na lupa laho manjagahon haulion ni lingkungan manang alam. 

Paduahon, marhite olopolop gabe dalan laho mamaritahon hadirion ni Debata. Di ende olopolopna i, tangkas do dipatuduhon Daud sialana umbahen marolopolop jala marlas ni roha ibana. Ala Jahowa do Raja jala na basa do Ibana. On do na ingkon sibaritahonon di tongatonga ni olopolop. Hadirion dohot pambahenan ni Debata ingkon do tarida di bagan olopolop na dihilala bangso i. Jala ingkon do botoon ni na humaliang do hadirion ni Debata i do siolophononhon ni bangso ni Debata. Marhite i, dipaingothon do hita angka na porsea asa unang madabu hita di haginjangon ni roha molo boi jumpang olopolop dohot angka las ni roha di ngolunta. Naeng ma angka na denggan na tajalo di ngolunta gabe dalanta mamaritahon hadirion dohot huaso ni Debata. Ala ingkon tangkas do auhononta di rohanta, ia molo so Debata na mandongani jala na patupahon, ndang adong manang aha jumpang hita di ngolunta on.

Patoluhon, marpangidoan ma tongtong tu Debata. Disosohon Daud do marhite endena on asa nasa na manangihon endena on tongtong ma marpangidoan tu Debata asa ditumpahi jala dipalua ma ngoluna. Boasa ditogihon Daud asa tongtong marpangidoan tu Debata? Ala ro di salelengnilelengna do basa ni Debata. Jala i do na ingkon tongtong diulahon angka na porsea di ngoluna, tongtong marpangidoan tu Debata asa tumpahanNa jala paluaonNa ngolunta asa boi pujionta goarNa na badia i. Laos i do na ingkon tongtong ulahononta di ngolunta nang pe di hamamasa ni parsahitan na binaeng COVID-19 on. Asa tongtong hita mangido tu Debata asa tumpahanNa jala paluaonNa hita. Asa molo naung ditumpahi jala dipalua hita, boi ma pujianta goarNa na badia i. Jala holan Ibana do na ingkon sipangasahononta.

Di hita na hinaholongan ni Tuhan Jesus Kristus,

Marhite turpuk on, di minggunta sadarion ima minggu JUBILATE, na marlapatan marolopolop, naeng ma tongtong hita marolopolop di ngolunta ala Debata. Nunga itadai pambahenanNa naung paluahon hita sian hamatean marhite panghophopon ni Jesus Kristus, ido alana ingkon sai tongtong hita marolopolop di ngolunta di sude gulmit ni ngolu na tabolus. Jala molo marolopolop pe hita, ingkon do dohot bahenonta lingkunganta marolopolop mamuji Debata. Jala asa olopolopta i ingkon gabe dalanta laho mamaritahon goar ni Debata. I do parolopolopon ni angka na porsea, angka na pinalua ni Debata. Amen.