Jamita Minggu Kantate

AMITA MINGGU KANTATE

“MANGENDEHON HALUAON NA SIAN TUHAN I”

(Pangungkapon 12 : 10 - 12)

         Pangungkapon ima sada buku na marisihon barita taringot tu na naeng masa di tingki na ro. Dilehon Debata do kesempatan di sude angka na porsea marnida angka na naeng masa di tingki na ro marhite parnidaan na pinasahat Debata tu Johannes na mian di Pulau Patmos hatiha i. Nian di mulanai digurithon pe barita on na laho pasahaton tona ni Debata tu angka na porsea na adong di luat na ginonggoman ni Romawi hatiha i na tongon mangadopi parungkilon ala ni panggosagosa ni portibi on marhite angka raja manang panggomgomi hatiha i. Digurithon surat on laho mangapuli jala mangalehon panghirimon di angka na porsea asa unang meret nasida sian ngolu haporseaon nasida tu Debata, jala asa margogo nasida mandalani ngolu di portibi on. Marhite parnidaan na patuduhon harajaon dohot gogo ni Debata i, asa tarapul angka na porsea jala marende las ni roha mamuji Debata songon na masa di turpuk on.

Di hita na hinaholongan ni Tuhan Jesus Kristus,

Di baritahon turpuk on do na masa do haduan soara na gogo di banua ginjang na mansoarahon asa marlas ni roha ma angka banua ginjang dohot pangisina. Aha do alana umbahen na ingkon marlas ni roha angka banua ginjang dohot pangisina? On do na laho hinalashon ni angka banua ginjang dohot pangisina ima ala nunga sahat haluaon dohot hagogoon dohot harajaon ni Debatanta dohot hamuliaon ni Kristus jala nunga dipabali angka na mangasungi angka hahaanggi ni banua ginjang. Haluaon dohot hamonangan i didapot alani mudar ni Birubiru i, ima Jesus Kristus dohot marhite hata na ni Debata na hinatindanghon. Ndang tartaluhon sibolis angka na rap dohot Birubiru ni Debata dohot na rap dohot hata ni Debata. Kristus dohot hata ni Debata ido na gabe sinjata laho manghamonanghon paraloan maradophon haholomon na binoan ni sibolis. Alanii do tama do marlas ni roha angka banua ginjang dohot pangisina.

Di hita na hinaholongan ni Tuhan Jesus Kristus,

Barita na hinalashon ni banua ginjang i dohot angka pangisina i, ido barita na laho sihalashononta di ngolunta di portibi on jala gabe paposhon rohanta laho mandalani ngolunta di bagasan hasatiaon tu Debata. Tangkas do botoonta na tongon dope hita mangadopi paraloan di ngolu haporseaon di portibi on (bnd. Epesus 6:12). Sai mangula dope sibolis laho manegai ngolu parsaoranta dohot Debata, laho manggugai ngolu ni banua ginjang na pinarade ni Debata di angka na  porsea di Ibana. Alai turpuk on gabe panghirimon di hita di na binaritahonna na so tolap ni sibolis i laho manegai hita dohot parsaoranta rap dohot Debata. Mudar ni Kristus dohot hataNa i do na gabe sinjata dohot hagogoon ni Debata laho manaluhon i gabe sahat ma haluaon jala hot harajaon ni Debata i. Allah itu tak terkalahkan dan kerajaanNya tidak tergoncangkan oleh apapun juga. Inilah jaminan bagi kita yang percaya agar kita tetap setia dalam iman kita.

Alanii di hita na hinaholongan ni Tuhan Jesus Kristus,

Tama do nang hita marlas ni roha jala marende mamuji Debata tongtong di ngolunta. Nang di tingki on pe. Di ragam ni hamaolan dohot gulmit ni ngolu na tabolus, diigil Debata do asa unang mansohot hita mamuji dohot marsomba tu Debata. Debata do na patupahon di hita haluaon jala Debata do na mamboan hita tu harajaonNa. Marhite mudar ni Kristus i do hita dibahen gabe ianakhonNa jala gabe panean di harajaonNa. Ido na ingkon tahatindanghon di ngolunta saleleng di portibi on. Jala i do nang pangahirimon di hita tongtong. Nang pe ragam dalan dipatupa sibolis laho manjehehon hita jala na laho manegai ngolu partondionta di adopan ni Debata, holan marhite na mangauhon jala na manghangoluhon mudar ni Kristus dohot hataNa i, ido na pamonanghon hita manaluhon sibolis di ngolunta. Alanii, hangoluhon ma mudarNa i dohot hataNa i di ngolunta, pamonangonNa do hita. Amen.