Malam Passion III

PARTORDING NI PARTANGIANGAN KELUARGA

DI BORNGIN PASSION III

08 April 2020

I.     PANGARADEON

01.  Partangiangan on niuluhon ni Ama manang Ina.

02.  Diaturhon ma na mamboanhon tangiang pangondianan

03.  Diparade hian ma Bibel, Buku Ende dohot inganan pelean.

04.  Andorang so dipungka partangiangan on denggan ma jolo diparsiajari isi dohot angka ende na di bagasan acara on.  

II.   PARTANGIANGAN

01. Marende BE No. 83 : 1 – 2

02. VOTUM – INTROITUS

(Molo partohonan do na manguluhon)

Marhitehite goar ni Debata Ama, dohot goar ni AnakNa, Tuhan Jesus Kristus, dohot goar ni Tondi Parbadia

(Molo so partohonan, langsung ma on dijaha)

Kristus manaon na porsuk humophop hamu, tumadinghon tiruan di hamu, asa diihuthon hamu bogas ni patNa. Ndang adong dosa diula Ibana, ndang jumpang angkal di bagasan pamanganNa. Ndang manginsahi Ibana di na hona insak, ndang mangasupi di na manaon na porsuk, alai dipasahat do tu Panguhum Sitigor roha i.

Martangiang ma hita:

Ale Tuhan Debata amanami na di banua ginjang, parasiroha na sumurung! Mandok mauliate ma hami tu Ho sian nasa rohanami ala dilehon Ho AnakMu na sasada i tu hamatean huophop hami asa unang mago na porsea di Ibana, alai hangoluan na saleleng ni lelengna di nasida. Tatap ma hami ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut, ala ni pelean na sun denggan na pinelehonNa i humophop hami. Sai paeleng ma pinggolMu tu tangiangnami jala asi ma rohaM di hami, marhitehite Anakmu Tuhan Jesus Kristus Tuhannami. Amen.

03. Marende BE No. 86 : 1

04. Panjahaon Bag. I

Torang ni arina i martuptup ma sude angka sintua ni malim dohot sintua ni bangso i dompak Jesus, laho mamusa Ibana. Ditali jala ditogu nasida ma Ibana laho pasahathon tu panguhum si Latus. Jadi dung diida si Judas, parjehe i, na naeng hona uhum nama Ibana, disolsoli ma rohana, dipaulak ma na tolupulu rupia i tu angka sintua ni malim dohot tu sintua ni bangso i; ninna ma: “Sala do ahu! Hujehehon do hape na so marpipot!” Alai didok nasida ma: “Ndang ro di hami i! Ho do na sari disi!” Jadi ditimpalhon ma perak i tu bagasan joro i, laos sumurut sian i laho maningkot. Alai dibuat angka sintua ni malim ma hepeng i, ninna ma: “Ndang jadi padomuon i tu arta ni joro, ai tuhor ni mudar do i!” Jala mardos ni roha nasida manuhorhonsa tu ladang ni pande hudon, bahen parbandaan ni halak dagang. Ala ni i do umbahen na margoar i ladang mudar ro di sadari on. Disi ma jumpang hata ni panurirang Jeremia na mandok: "Dibuat nasida do na tolupulu rupia i, asam ni na niasam, diasam deba anak Israel. Dung i dilehon ma i manuhor ladang ni pande hudon, songon na nidokkon ni Tuhan i tu ahu."

Asa ditogihon nasida ma Jesus sian jolo ni si Kayapas tu kantor. Alai sogot ma i manogot i. Ndang na bongot anggo nasida tu kantor, asa unang tarsubang nasida laho manganhon Paska i. Gabe ruar ma si Latus mandapothon nasida, didok ma: “Pangaluan dia do diboan hamu dompak Halak on?” Dung i ninna nasida ma mangalusi: “Aut unang sibahen na jahat Halak on, ndang tagamon pasahatonnami Ibana tu ho”. Gabe ninna si Latus ma mandok nasida: “Boan hamu ma Ibana, uhumi hamu ma Ibana marguru tu adatmuna.” Alai ninna angka Jahudi ma mandok ibana: “Ndang jadi pusaonnami manang ise”. Jumpang ma disi na nidok ni Jesus, uju pinaboana i hian pangalaho ni parmatena.

05. Marende BE No. 81 : 1

06. Panjahaon Bag. II

Dialuhon nasida ma Ibana, ninna ma: “Na dapot hami do on pabalikbalikkon bangsonami jala mangorai mangalehon guguan tu Kesar i; dipandok, Raja Kristus do Ibana.” Disungkun si Latus ma Ibana: “Atehe, raja ni halak Jahudi do Ho?” Jala ninna Jesus ma mangalusi ibana: “Songon nidokmi do tutu!” Alai godang do dipartuhashon angka sintua ni malim dompak Ibana. Jadi dibongoti si Latus muse kantorna, dijou ma Jesus, didok ma tu Ibana: “Atehe, Ho do raja ni Jahudi?” Ro ma alus ni Jesus: “Na sian roham do na nidokmi, manang na nidok ni halak do i tu ho taringot tu Ahu?” Gabe dialusi si Latus ma: “Ai halak Jahudi do ahu? Bangsomi dohot angka sintua ni malim i do pasahathon Ho tu ahu. Aha do na binahenmu?” Jadi dialusi Jesus ma: “Ndang sian portibi on harajaonku. Aut sian portibi on harajaonku, ndang tarbahen so mangalo angka naposongki, asa unang sahat Ahu tu angka Jahudi, alai ndang sisongon i harajaonki.”

Dung i ninna si Latus ma mandok Ibana: “Asa raja do Ho?” Jadi ninna Jesus ma mangalusi: “Songon na nidokmi ma tutu. Raja do Ahu! Umbahen na tubu Ahu jala umbahen na ro Ahu tu portibi on, asa huhatindangkon hasintongan i. Ganup na sian hasintongan i tangihonon ni i do soarangku.” Jadi ninna si Latus ma mandok Ibana: “Aha ma i, hasintongan i?” Jadi dung didok sisongon i, ruar ma ibana muse manopot angka Jahudi mandok tu nasida: Ndang jumpang ahu manang dia salana.”

Alai lam digogohon nasida do mandok: “Digunturi Ibana do bangso i, ai sai mangajari Ibana di sandok tano Judea, mamungka sian Galilea sahat ro tuson.” Alai umbege i si Latus, manungkun ma ibana, manang halak Galilea Ibana? Jala dung diboto, na sian gomgoman ni si Herodes Ibana, disuru ma Ibana tu jolo ni si Herodes, ai tongon do ibana di huta Jerusalem uju i. Marnida Jesus si Herodes i, las situtu ma rohana; ai nunga na nia lelengna, sai naeng idaonna Ibana, ala naung dibege baritana, jala diarop rohana, idaonna tanda sada sipatupaonna. Jadi godanggodang ma disungkunhon tu Ibana; alai ndang adong dialusi Jesus ibana. Disi do angka sintua ni malim ro di sibotosurat, jala gogogogo do Ibana dialuhon. Ia si Herodes rap dohot angka donganna, direhei jala dilealeai do Ibana, disolukkon ma pangkean na arga tu Ibana, laos songon i ma disuru Ibana mulak tu si Latus. Jadi di na sadari i ma maraleale si Herodes dohot si Latus, ai na masihosoman do nasida anggo nasailaon.

07. Marende BE No. 76 : 4

08. Panjahaon Bag. III

Alai didokkon si Latus ma angka sintua ni malim, angka panungganei ro di natorop i marpungu, ninna ma mandok nasida: “Diboan hamu do Halak on tu jolongku, sipabalik bangso didok hamu; jala di jolomuna hutangkasi i, gabe ndang adong jumpang ahu di Halak on sala, angka na tinuhashonmuna tu Ibana. Si Herodes pe songon i do, disuru do Ibana mulak tu jolonami; asa ndang adong parulaonna, na tama mambahen Ibana marutang hosa.”

Dung i dialuhon angka sintua ni malim dohot sintua ni bangso i ma Ibana; alai ndang dialusi manang aha. Jadi didok si Latus ma tu Ibana: “Ndang dibege Ho godang ni na hinatindangkonnasida dompak Ho?” Alai ndang dialusi Ibana nanggo sada hata, pola longang situtu roha ni panguhum i. Alai peam do dipalua panguhum i di pesta i sada halak na tarhurung, marguru tu na tinodo ni natorop. Alai adong ma tarhurung uju i sada parjahat na sumalin, na margoar si Barabas. Jadi di na pungu i nasida, didok si Latus ma tu nasida: “Ise do dipangido hamu paluaonku, si Barabas manang Jesus na targoar Kristus?” Ai diboto do, late ni rohanasida do umbahen na dipasahat nasida Ibana. Alai di na hundul i ibana di habangsa paruhuman i, ditonahon jolmana ma tu ibana: “So tung dihahua ho halak na tigor i, ai susa situtu do ahu naborngin di nipingku ala Ibana.” Alai sai disosoi angka sintua ni malim rap dohot sintua ni bangso i natorop, asa dipangido nasida, malua si Barabas, alai pusaon do anggo Jesus. Dung i ninna panguhum i ma mandok nasida: “Ise sian na dua i dipangido hamu paluaonku?” Jadi didok nasida ma: “Si Barabas!” Dung i didok si Latus ma tu nasida: “Antong, aha ma bahenonku tu Jesus, na targoar Kristus?” Gabe saluhut nasida, mandok: “Parsilangkon ma!” Alai ninna panguhum i ma: “Ai aha na jahat dibahen?” Jadi lam gogo ma dipanjoujouhon: “Parsilangkon ma!”

09. Marende BE No. 77 : 3

10. Panjahaon Bag. IV

Dung i ditogu si Latus ma Jesus, didokkon ma linsingan. Jadi didandani angka soldadu ma sungsang duri bahen tumpal, diampehon ma i tu uluna; baju dapdap ma dialithon tu dagingna. Dung i ro ma nasida tu jolona mandok: “Tabi di Ho, ale raja ni Jahudi!” Laos dipastapi ma Ibana. Dung i ruar ma muse si Latus, didok ma tu angka Jahudi: “Ida hamu ma, hutogihon do Ibana tu jolomuna, asa diboto hamu, na so adong jumpang ahu salana.” Laos ruar ma Jesus manjujung sungsang duri jala marbaju dapdap. Jadi didok si Latus ma tu nasida: “Ida hamu ma Jolma i!” Asa dung diida angka sintua ni malim dohot angka naposo Ibana, dijouhon nasida ma: “Parsilangkon, parsilangkon ma Ibana!” Dung i didok si Latus ma tu nasida: “Boan hamu ma Ibana, parsilangkon hamu ma; ai ndang jumpang ahu salana.”

Gabe dialusi angka Jahudi ma Ibana, ninna ma: “Marguru tu patiknami ingkon marutang hosa Ibana, ai dibahen do dirina Anak ni Debata.” Umbege i si Latus lam ganda ma biarna.

Dung i diulahi muse tu kantorna, didok ma tu Jesus: “Sian dia do Ho?” Alai ndang dialusi Jesus ibana. Dung i didok si Latus ma tu Ibana: “Ndang angkupanmu ahu mangkatai? Ndang diboto Ho, marhuaso ahu paluahon Ho, jala marhuaso pasilangkon Ho?” Jadi dialusi Jesus ma: “Ndang adong huasom mangago Ahu, aut unang nilehon i tu ho sian ginjang. Dibahen i gumodang do dosa ni na pasahathon Ahu tu ho.” Jadi olat ni i ma dilului si Latus dalan paluahon Ibana. Alai manjoujou ma angka Jahudi, ninna do: “Molo dipalua ho On, ndang aleale ni Kesar ho! Ai na mangalo Kesar i do ganup na mambahen dirina raja.”

Asa dung dibege si Latus hata i, ditogihon ma Jesus haruar, laos hundul ma ibana di habangsa paruhuman na di inganan na margoar: Pantar batu, alai anggo di hata Heber: Gabbata. I ma na masa di ari parhobasan Paska, mareak hos ni ari. Dung i didok ma tu angka Jahudi: “Ida hamu ma rajamuna!” Alai digogo nasida ma manjouhon: “Padao, padao ma I: Parsilangkon ma Ibana!” Dung i didok si Latus ma tu nasida: “Parsilangkononku ma rajamuna?” Jadi dialusi angka sintua ni malim ma: “Ndang adong rajanami dungkon ni Kesar i!”

Asa dung diida si Latus, na so marguna hatana, lam ganda tahe gaorna, dibuat ma aek mamburi tanganna di jolo ni natorop i, huhut mandok: “Lias do ahu sian mudar ni On! Hamu do na sari disi!” Dung i ninna sude natorop i ma: “Marsapata tu hami dohot tu ianakhonnami ma mudarna i!” Dung i saut ma dipalua si Barabas; alai anggo Jesus dilinsingi, dung i dipasahat ma, asa diparsilangkon. Jadi diboan angka soldadu ni panguhum i ma Jesus tu bagas paruhuman, diarahon ma sude dongannasida manahopi Ibana

11. Marende BE No. 88 : 2

12. JAMITA: Jesaya 53 : 10 – 11

SITAONON NA MAMBOAN HALUAON DOHOT HANGOLUAN

Huria na hinaholongan ni Tuhan Jesus Kristus

On ma borngin patoluhon jala borngin na parpudi di hita marningot pardalanan ni Jesus na manaon sitaonon. Boha do hita marnida sitaonon ni Kristus tu ngolu ni partondionta?

Parjolo, sitaonon ni Kristus patuduhon hadirion ni Debata na sai pasauthon hataNa. Andorang tubu Jesus di portibi on, nunga dibagabagahon manang nunga disuriranghon Debata marhite panurirangna tu bangsoNa taringot tu naposoNa na ingkon mangadopi sitaonon songon na sinuriranghon ni Jesaya tu bangso Israel. Jala ido na saut marhitehite ngolu ni Jesus na marsitaonon sahat tu hau na pinarsilang i. Alanii, molo tataringoti pe pardalanan sitaonon ni Jesus, na naeng paingothon hita do i taringot tu parsitutuon ni Debata di hataNa. Na ingkon saut do hataNa di tongatonga ni portibi on. Alanii, naeng ma hita angka na porsea gomos maniop hata ni Debata di parngoluanta. Ai saluhut na hinatahonNa i ingkon saut do i hombar tu partingkian na binuhulNa.

Paduahon, lomo ni roha ni Debata do sitaonon ni Jesus i. Pandohan on naeng patuduhon huaso ni Debata na mangula jala na manontuhon. Nian molo tapaihutihut pardalanan ni sitaonon ni Jesus i, saluhutna hira na dipasahat jala hira na binahen ni ulaon ni tangan ni jolma. Hira na hinalomohon ni torop halak di tingki i do gabe marsitaonon Jesus sahat tu hau pinarsilang. Sai hira holan ala ni pambahenan ni si Judas do umbahen na tartangkup Jesus jala dipasahat tu paruhuman. Sai hira holan ala na sinoarahon ni angka na torop di tingki i mandok di parsilanghon Ibana umbahen gabe diparsilangkon Jesus. Nian ingkon marsitaonon jala sahat tu hamatean do Jesus di ngoluNa, alai marjea do halak na pasahathon Ibana (bnd. Mat. 26:24). Na hinalomohon ni Debata do sitaonon na masa di Jesus i. Ndada lomo ni roha ni jolma na pasauthon i. Di tangan ni Debata do kuncina. Laos songon i do di ngolunta di portibi on. Di tangan ni Debata do saluhutna, huaso ni Debata do na manontuhon saluhutna. Ndada huaso ni jolma. Alanii, marhite sitaonon ni Jesus diajari do hita marnida hadirion ni ngolunta na tongtong di bagasan panggomgomion ni Debata. Ndang adong na sahat molo so Debata manontuhon. Alanii, sai naeng pos rohanta di pandonganion ni Debata.

Patoluhon, sitaonon na marguna jala na marlapatan do sitaonon ni Jesus. Sitaonon ni Jesus i do dalan parohon hangoluan dohot hadengganon di angka jolma. Alani dosanta do Ibana manaon na hansit jala sahat tu hamatean. Jala ditaon huhut didalani Ibana do i asa dapotan haluaon dohot hangoluan do saluhut jolma pardosa i. Mansa balga do pambahenanNa i di ngolunta. Ala na olo do Ibana marsitaonon gabe malua hita jala dapotan hangoluan hita di harajaon ni Debata. Alanii ndang sihailahononhon sitaonon ni Jesus i, ala sihalashononhon jala sibaritahononhon. Ndada sitaonon na so marguna sitaonon ni Jesus i, ala sitaonon na mamboan hita tu haluaon dohot hangoluan do sitaononNa i. Ingkon halashononta do i jala ingkon hatindanghononta do i di parngoluanta saleleng di portibi on.  Amen.

13. Marende BE 87 : 1 + 8

14. TANGIANG PANGONDIANON

15. Marende BE 622 : 1 – 2      (Pelean)

16.   Tangiang Panutup