MINGGU PALMARUM 05 APRIL 2020

ACARA MINGGU PALMARUM

PARMINGGUON DI BAGAS KELUARGA

TOPIK: IDA MA, NA RO DO RAJAM !

MINGGU,  05 APRIL  2020

PARHOBASON:

1.       Partangiangan on niuluhon ni Ama manang Ina.

2.      Diaturhon ma na mamboanhon tangiang pangondianan

3.      Diparade hian ma bibel, buku ende dohot inganan ni pelean.

4.   Andorang so dipungka partangiangan on denggan ma jolodiparsiajari angka ende na di bagasan acara on.  

ACARA PARMINGGUON

01.     Joujou Marsomba Tu Debata:  (U=Uluan; K =Keluarga; S=Sude)

U  : Selamat ari Minggu ma di Hita!

       Hamu dongan sahaporseaon! Digoari do Minggu sadari on ima Minggu Palmarum, marningot di tingki bongot Tuhan Jesus tu huta Jerusalem. Deba sian natorop i pahembanghon ulos nasida tu dalan i, na deba nari manallihi ranting ni angka hau jadi dipanserakhon tusi.  Alai sude do natorop i, angka na di joloNa nang na mangihut sian pudi pe, mangolopolophon: “Hosianna di Anak ni Raja Daud. Pinasupasu ma na ro marhitehite goar ni Tuhan i. Hosianna ma di ginjang.”

       Jangkon hamu ma Jesus i bongot tu bagasan rohamuna, rata ma nang haporseoanmuna songon bulung maremare. Jou hamu ma goarNa ganup ari. Antong taparade ma dirinta, tapuji ma Tuhanta, marende ma hita!

02.  Mangendehon BE No. 581 : 1 + 3 “Sangap Di Jahowa”

[1] Sangap di jahowa na sun timbul i,  Balga ni holongNa ndang tarasam i, Di lehon AnaklNa na sasada i, manobus hita jolma pardosa i. Puji ma Debata ale manisia, Las roham las roham somba ma Debata. Dapothon Jahowa na sun timbul i, Marhite AnakNa Tuhan Jesus i. ~

 [3] Balga situtu pambaenMi Debata. Tung so hasuhatan holong ni rohaM. Tu jolma pardosa asi do rohaM, Diungkap Ho dalan lao tu banuaM. Puji ma Debata ale manisia, Las roham las roham somba ma Debata. Dapothon Jahowa na sun timbul i, Marhite AnakNa Tuhan Jesus i.

03.  Votum - Introitus

U:     Asi ma rohaM di ahu, ale Jahowa, ai targogot do au, maras do rohangku dohot dagingku. Alai anggo au, tu Ho do ahu marhaporusan, ale Jahowa, ningku do: Ho do Debatangku. Marguru tu tanganMu do angka parsorionki, sai palua ma ahu sian tangan ni angka musungku dohot sian angka namangalotongi ahu. Ale Jahowa, sai unang paurak ahu, ai Ho do na hujou, sai palua ma ahu marhite hatigoranMu. Haleluya! 

S: (Mangendehon) Haleluya, Haleluya, Haleluya.

U:     Martangiang ma hita:  Ale Tuhan Debata Parasiroha nasumurung! Asi ma rohaM di hami halak na gale on. Di ida Ho do nuaeng musunami di portibi on, songoni nang di negaranami on, ima wabah virus corona na mambahen hami mabiar di ngolunami siganup ari. Sai ramoti ma hami saluhutna maralohon i jala padao ma sian hami mara ala ni parsahiton i marhite panaonon ni Anak haholongan ni rohaM, Tuhan Jesus Kristus. Amen.

04. Mangendehon BE No. 140 : 1 - 2  “Girgir Ma Hamu”

[1]  Girgir ma hamu manogu sude na hum na begu manjua dope, Di hata ni Jesus na sangap tongtong sangkapNa patulus di portibi on. ~  

[2]  Ndang jadi hamu mabiar ale  sai pangke burju gogoM sasude, Nang hehe sibolis mamolgak hamu, Sai tatap ma Jesus pargogo tutu.

05.  Patik :

U:   Hamu na hinaholongan dibagasan goar ni Tuhanta Jesus Kristus. Ndang tagamon so mabiar hita ala ni na masa di partingkian sisaonari on. Saluhutna do hita manjamothon diri asa unang songgop tu hita wabah virus corona. Tahaporseai ma hata ni Tuhanta na gabe patik di Minggu ta sadari on, ima na tarsurat di 2 Timotius 1:7 “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton”. Ido sahat na. Antong rap mangido gogo ma hita tu adopan ni Debata.

S: Ale Tuhan Debata! Sai pargogoi ma hami mangulahon na hombar tu PatikMi. Amen.

06. Mangendehon BE No. 162 : 1 + 3 “O Debata, Mansai Balga”

[1] O Debata, mansai balga, huhut dokdok dosangku. Na so adong di tano on, na tau haporusanku. ~ [3] I pe tu Ho nama au ro, sai unang tulak ahu. Paombun ma o Debata, rimasMu mida ahu.

  

07.  Renungan Situasional / Hasesaan ni dosa

U: Ale Tuhan Debata, na badia jala na bonar. Parasi jala Partalup ni roha. Sai marpangulahi ma rohaM mida hami. Dibahen i sai sesa ma sude dosanami! Ndang adong na hupangasahon hami dungkon ni asi ni rohaM; hatigoran na pinatupa ni AnakMu do na hupangasahon hami tu joloM. Dibahen i pasonang jala apuli ma hami, asa manongtong haporseaonnami mangihuthon Ho, molo tung pe maheu gogonami, bontar nang simanjujungnami, homur parnidaannami nang hallang dilanami, alai lam tu imbaruna ma haporseaonnami.

(Mangendehon BE No. 182 : 1  “Tu JoloM, O Debatangku)

Tu joloM o Debatangku sai use do rohangkon. Sai pasiat tangiangku dohot iluilungkon.

U: Ale Tuhan Debata, Ho do mula ni ngolu di saluhut jolma. Jala Ho do haporusannami. Molo tung mabiar pe hami, hitir simanjojaknami ala ni na masa diparngoluon nami di tingki on, sai patogu ma haporseaonnami! Molo gale pe pardagingonnami nuaeng, sai pargogoi jala patogu haporseaon dohot panghirimonnami. Asa unang lilu roha dohot pingkirannami alai asa tangkas huboto hami sangkapMu di ngolunami marhite angka na masa nuaeng di tongatonga ni ngolunami. Asa lam marsihohot hami jala marhaporusan tu Ho hami tongtong.

~~~martangiang na hohom~~~

U: Baga-baga ni Debata taringot tu hasesaan ni dosanta : Songon on do Hata ni Jahowa : Unang ho mabiar, ai Ahu do siluluhon ho; nunga pola hujou goarmu, Ahu nampuna ho. Hasangapon ma di Debata na di ginjang.

K: Amen.

08. Mangendehon BE No. 129 :1 + 3 “Ai Beasa Di Balian”

[1] Huhalashon, huringkoti  haroroM tu tano on. Jesus Sipalua hami jolma na mardangol on, Ai marhite mudarMi dihophopi Ho do i, HuriaM asa badia Jala dohot marmulia.  ~

 [3] Ro sai ro Ho, o Tuhanku Jesus ro ma Ho tibu.I panjou ni oroanmu na malungun situtu. Ro ma Ho, O Jesuski tatap haporsuhonki. Sai tu hasampuran rea alaponMu na porsea

09. E P I S T E L: Jesaya 52:7-12 (Dijaha ma secara responsoria)

U  : (dung sidung dijaha isi ni ayat) Ima sahatna. Martua ma angka na tumangihon Hata ni Debata jala na umpeopsa. Amen.

10.   Mangendehon BE No. 199 : 1 - 2   “Tibu Ma Jumpang Tingki”

[1] Sai ingot Jesus, Tuhanmi naung ro tu hita jolma, Na tumadingkon  surgo i, Na gabe dongan jolma. Sai unang halupahon i, Ai i do hangoluanmi. Sai puji ma Ibana. ~

 [2] Sai ingot Jesus, Tuhanmi sitaon godang na bernit, Di hau pinarsilang i,  humophop ho parsahit. Ai ho tama manaon sude, na mangonai tu Jesus i, Sai puji ma Ibana

11.     TANGIANG PANGONDIANON

12.    Mangendehon BE No. 391 : 1 “Dijouhon Jesus Ro”

Dijouhon Jesus : Ro sude, hamu na loja i. Hu togutogu do hamu tu hasongan i. Hamu sude pamanat i. Hamu ni arahonna i. Tadingkon ni arsakkonmi, dompakkon Tuhan i. Sonang ni roha i. Sonang ni roha i. Sonang ni roha i dilehon Jesus i.

13.    J A M I T A : Johanes 12:12-19.

IDA MA, RAJAM DO NA RO

Popularitas, somalna patubuhon ragam respon sian angka na humaliangna. Adong do halak las rohana manang lomo rohana mida halakna populer manang terkenal. Bahkan ala las ni rohana, manang aha na niula dohot na binahen ni halak na populer i sai diboto jala mambahen ibana gabe figur manang tudosan di ngoluna. Jala las do rohani i molo ro ibana. Alai sai adong do halak na so marlomo ni roha mida halak boi populer manang dipujipuji halak. Sikap na si songoni do boi idaonta di barita turpuk on, ima barita na mambaritahon taringot pardalanan ni Jesus laho mamasuhi luat Jerusalem.

Huria na hinaholongan ni TUHAN Jesus Kristus,

Nunga tung sar barita taringot Jesus di tongatonga ni halak Jahudi. Jala memang manang tudia Jesus mardalan, sai torop do halak na paihuthut pardalananNa i. Adong do halak na paihutihutIbana ala naeng marnida huasoNa manang manangihon hataNa, adong do halak na paihutihut Ibana laho mangalului hasalaanNa, alai memang adong do na setia paihutihut Ibana, ima angka siseanNa i. Laos songoni do di pardalanan ni Jesus laho mamasuhi Jerusalem uju mandapothon Pesta Paskah na ni pestahon halak Jahudi hatiha i.Tangkas do dibaritahon marhite turpukon taringot tu pangalaho na masa disi, ima:

Parjolo, taringot tu pangalaho ni angka natorop merespon haroro ni Jesus tu Jerusalem i. Di turpuk on tangkas do dipatuduhon soara olopolop dohot las ni roha ni natorop manomunomu Jesus. Jala songon tanda las ni rohanasida, ditomutomu nasida do Jesus mamangka maremare, ima bulung na menyimbolkan kemenangan dohot hangoluan. Marhite na manomunomu Jesus mamangke maremare, naeng patuduhon panghirimon hamonangan dohot hangoluan na binoan ni Jesus. Laos udut ni panghirimon i, di”deklarasi”hon nasida do Jesus gabe Raja ni Israel. Tubu do pambahenan sisongoni ala memang tangkas do diida nasida huaso ni Jesus tarlumobi di nadipahehe Jesus si Lazarus i. Dijangkon nasida do Jesus jala dipangasahon nasida do Jesus na laho manguluhon nasida tu hamonangan dohot hangoluan ala nunga diida, didai jala dibege nasida huasoni Jesus i. Alai adong do halakna merasa dirugikan di peristiwa na masa i, na merasa gagal laho mangulahon sangkapna ala torop halak na mamuji jala marolopolop ala Ibana.

Paduahon, Raja dame do Jesus na ro i, ndada raja na laho pajongjong parporangan. Ido na pinatuduhon turpuk on di na dibaritahon na marhalode doJesus masuk tu Jerusalem. Halode somalna dipangke gabe siboan boban ni jolma. Halode ima pahanpahanan na lambat mardalan jala ndang pahanpahanan na boi pangkeon laho marporang. Marhite i, Jesus naeng patuduhon karakter ni hadirionNa na lambok jala na ro mamboan dame. Ido misi na binoan ni Jesus. Laos ido na tinuhuk ni Jesus di hau pinarsilang. Boban dosa ni jolma jala na laho padamehon dohot mamboan hangoluan tu jolma, ido misi ni Jesus. Jala laho tusi do Ibàna di na  mamasuhi Jerusalem songon na binaritahon turpuk on.

Huria na hinaholongan ni TUHAN Jesus Kristus,

On ma Minggu Palmarum di partingkian ni hurianta andorang sahat tu Parningotan ari Hamamate ni Tuhanta Jesus ima di ari Jumat jala diuduti tu Parningotan Haheheon ni Tuhanta Jesus. Naeng ma tangkas pangaradeonta manomu pesta las ni rohanta i. Alani i do dipaingothon turpuk on tu hita:

Parjolo, naeng ma saluhut pambahenan ni TUHANta naung patupahon angka haulion, tarlumobi naung patupahon hangoluan di hita marhite hamamateNa dohot haheheonNa i lam mangonjar hita manjangkon Ibana di ngolunta. Manjangkon Ibana ndada holan manjangkon boti, alai manjangkon Ibana laho mangarajai, manguluhon dohot manggomgom ngolunta. Asa Ibana manghamonanghon hita di paraloanta di portibion. Tarlumobi di partingkian nuaeng, asa tongtong hita mambahen Ibana gabe rajanta, mangido panorangionNa, jala sai saor tu Ibana asa tahamonanghon paraloan mangadopi parsahitan na masa nuaeng.

Paduahon, Jesus Kristus do na mamboan hadameon tu parngoluanta di portibi on. Holan di bagasan Jesus do hita boi mandapot roha dame dohot halambohon. Alani i manang ise naung manjangkon Jesus, sai mangolu do i di bagasan dame nang pe gaor humaliang. Jala molo gaor pe nuaeng portibi on binahen ni parsahiton na masa nuaeng on, alai anggo angka na porsea dang gabe dohot gaor ngoluna dohot rohana. Sai dame do panghilalaanna ala Jesus Kristus naung jinangkonna hibul di ngoluna. Laos parbue ni roha dame i, margogo jala sai ingot do angka na porsea marsaor dohot Debata huhut mangulahon angka ulaon na manghorhon hadameon di angka na humaliangna.

Amen.

14.   Marende BE. No. 806 : 1 + 3    “Aha Pe Masa Di Ngolumon” (Pelean)

[1] Aha pe masa di ngolumon Tuhan manjaga ho, HolongNa do mangondihon ho Tuhan manjaga ho. Tuhan manjaga ho las pe roham marsak pe ho, Sai diramoti ho Tuhan manjaga ho. ~ [3] Molo borat siporsanonmi, Tuhan manjaga ho, Tung pe golap parnidaanmi, Tuhan manjaga ho. Tuhan manjaga ho las pe roham marsak pe ho, Sai diramoti ho Tuhan manjaga ho.

15.    Rap Mandok : Tangiang Ale Amanami.

Mangendehon : Amin, Amin, Amin!