BORNGIN PASSION II

PARTORDING NI PARTANGIANGAN KELUARGA

DI BORNGIN PASSION II

(Dipatupa andorang so ari Minggu Palmarum, 05 April 2020)

I.     PANGARADEON

01.  Partangiangan on niuluhon ni Ama manang Ina.

02.  Diaturhon ma na mamboanhon tangiang pangondianan

03.  Andorang so dipungka partangiangan on denggan ma jolo diparsiajari isi dohot angka ende na di bagasan acara on.  

II.   PARTANGIANGAN

01. Marende BE No. 83 : 1 – 2

02. VOTUM – INTROITUS

(Molo partohonan do na mangulahon)

Marhitehite goar ni Debata Ama, dohot goar ni AnakNa, Tuhan Jesus Kristus, dohot goar ni Tondi Parbadia

(Molo so partohonan, langsung ma on dijaha)

Asi ma rohaM di ahu, ale Jahowa, ai targogot do ahu, maras do rohangku dohot dagingku. Alai anggo ahu, tu Ho do ahu marhaporusan, ale Jahowa, ningku do: Ho do Debatangku. Marguru tu tanganMu do angka parsorionki, sai palua ma ahu sian tangan ni angka musungku dohot sian angka na mangalotongi ahu. Ale Jahowa, sai unang paurak ahu, ai Ho do na hujou, sai palua ma ahu marhitehite hatigoranMu.

Martangiang ma hita!

Ale Tuhan Jesus, sasada Ho do sipangolu padomuhon jolma dohot Debata! Hupuji hami goarMi, jala hudok hami mauliate tu Ho ala ni saluhut na binahenMi, patupahon hangoluannami. Sai dongani ma hami marhitehite asi ni rohaM, asa hupingkiri hami tongtong na tinaonMu dohot hamamateM, asa huarsakhon hami dosanami jala asa tubu di hami haporseaon na sintong, jala asa marroha haholongan hami huhut mandok mauliate tu Ho, asa olo hami mangihuthon Ho ro di hamatean. Ale Tuhan Jesus, di Ho ma tama pujipujian di tongatonga ni saluhut huria, naung tinobusMu marhitehite mudarMu na badia i, olat ni on ro di salelenglelengna. Amen.

03. TURPUK: Johannes 12 : 12 - 19

04. Marende BE No. 81 : 1 + 3

05. Panjahaon Bag. I

Tagan jolma Ibana, dipelehon do angka pangidoanna dohot elehelekna, mardongan angguk bolon dohot iluilu tu na tuk paluahon Ibana sian hamatean; jadi ditangihon do Ibana, gabe malua sian hatahuton i. Ai atik pe Anak i Ibana, diguruhon do pangoloion marhite sian na tinaonanna i! Jala dung rimpas gabe sihorhon haluaon salelenglelengna do Ibana di sude na mangoloi Ibana. Digoar Debata do Ibana sintua ni malim, mangihuthon horong ni si Melkisedek.

Dung i sahat ma Jesus rap dohot nasida tu porlak sada na margoar Getsemane. Jadi didok ma tu angka sisean i: “Hundul ma hamu jolo dison, saleleng disan Ahu martangiang.” Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. Jala didok ma tu nasida: “Mansai marsak situtu do rohangku, hira na mate do. Dison ma hamu, dungo rap dohot Ahu!” Dung i laho ma Ibana saotik tujolo, dipatungkap ma bohina tu tano martangiang, ninna ma: “Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do!” Dung i mulak ma Ibana tu angka siseanna, jala tarpodom do nasida didapot, jadi didok ma tu si Petrus: “Ndang margogo hamu hape dungo rap dohot Ahu nanggo sangombas? Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging!”

Dung i laho ma Ibana paduahalihon martangiang, ninna ma: “Ale Amang, molo so tarbahen salpu on, nda ingkon huinum, sai saut ma lomo ni Roham!” Dung i di na ro i Ibana, tarpodom muse ma nasida didapot, ai mansai dokdok do salibonnasida. Jadi ditadingkon ma nasida, diulakkon ma laho martangiang patoluhalihon, mandok hata ondeng. Dung i didapothon ma muse angka siseanna jadi didok ma tu nasida: “Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa. Hehe ma hamu, laho ma hita! Ndi, nunga, ro na pasahathon Ahu!”

06. Marende BE No. 152 : 1

07. Panjahaon Bag. II

Alai diboto si Judas siparjehe i do inganan i, ai jotjot do marpungu tusi Jesus dohot angka siseanna. Ia si Judas i, diarahon ma angka soldadu dohot angka naposo ni sintua ni malim, didapothon ma tusi, mantat sulusulu, palito dohot sinjata. Diboto Jesus do saluhut na naeng songgop tu Ibana, jadi ruar ma Ibana, didok ma tu nasida: “Ise do na jinalahanmuna i?” Gabe ninna nasida ma mangalusi Ibana: “Jesus, halak Nasaret i do!” Dung i ninna Jesus ma mandok nasida: “Ahu do i!” Alai dohot do si Judas siparjehe i jongjong di lambungnasida. Asa dung didok tu nasida: Ahu do i, sumurut ma nasida, angka martinggangan ma tu tano. Dung i diulahi ma manungkun nasida: “Ise do na niluluanmuna?” Jadi didok nasida ma: “Jesus, halak Nasaret i do.” Dung i ninna Jesus ma mangalusi: “Nunga hupaboa tu hamu: Ahu do i. Asa molo Ahu dilului hamu, loas hamu ma laho angka on! Ai naeng do jumpang hata na nidokna i: Ndang adong na mago hubahen agia sada sian angka na nilehonmi tu Ahu.”

Alai nunga dipabotohon parjehe i hian partinandaan tu nasida, ai didok do: “Ia i na huumma, Ibana ma i; i ma tangkup hamu!” Asa pintor didapothon ma Jesus, didok ma: “Tabi di Ho, Guru!” Laos diumma. Alai ninna Jesus ma mandok ibana: “Marhua ho tuson, anggia?” O Judas, pangummaon do hape dibahen ho, pasahathon Anak ni jolma i? Dung i ro ma nasida, dilaluhon ma tangannasida tu Jesus manangkup Ibana.

Dung i adong ma sada sian angka dongan ni Jesus, i ma si Simon Petrus na  mangalaluhon tanganna, disintak ma podangna, ditampulhon ma tu naposo ni sintua ni malim sahalak, dipisikkon ma pinggolna siamun; si Malkus do goar ni naposo i. Jadi didok Jesus ma tu ibana: “Sae ma i! Pasarung podangmi, ai na manintak podang, mago ma bahenon ni podang! Ai na so tarbahen Ahu do di roham mangido sian Damang, asa dipadiri di Ahu saonari lobi sian sampuludua loksa surusuruan? Alai songon dia ma disi saut hata ni Surat i na mandok: Ingkon masa do na songon i? Nda inumonku siinumon na nilehon ni Ama i tu Ahu?” Dung i dijama ma pinggol i, dipamalum ma halak i. Uju i ma didok Jesus tu angka natorop i: “Hira na dompak panamun do hamu hehe, marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu. Alai na masa do sudena on, asa jumpang hata ni angka panurirang i.” Dung i ditadingkon saluhut sisean i ma Ibana laho maporus. Dung i ditangkup angka soldadu dohot induknasida ro di angka naposo ni Jahudi ma Jesus, jala diihoti.

08. Marende BE No. 487 : 1

09. Panjahaon Bag. III

Jadi ditogihon ma Ibana jumolo tu si Hannas, i ma simatua ni si Kayapas, sintua ni malim di na sataon i. I ma si Kayapas, naung mandok tu angka Jahudi: Dengganan do mate sada halak humongkop, bangso i. Alai diihuthon si Simon Petrus dohot sisean na sada nari ma Jesus. Na masitandaan sisean na sada i dohot sintua ni malim i, jadi bongot ma ibana rap dohot Jesus tu alaman ni malim i. Alai jongjong do si Petrus tartungkan balian di lambung pintu i.

Alai disungkun sintua ni malim i ma Jesus taringot tu angka siseanna dohot taringot tu podana i. Jadi dialusi Jesus ma ibana, ninna ma: “Patar do hatangki di hatoropan. Na tongtong do Ahu mangajari nasailaon di bagasan parguruan nang di bagas joro pe, parpunguan ni saluhut Jahudi; ndang adong manang aha huhatahon marsibuni. Boasa Ahu disungkun ho? Nasida naung umbege hatangki, i ma sungkun! Ai diboto nasida do na huhatahon i.” Dung didok Jesus songon i, dipastap sada opas na jongjong disi ma Ibana, huhut ma didok: “Songon i do pangalusim di sintua ni malim i?” Dung i ninna Jesus ma mangalusi ibana: “Ia na hurang na hudok, hajongjongkon hurangna; alai anggo na hona do, boasa pastaponmu Ahu?”

Asa disuru di Hannas ma Ibana naung tinali tujolo ni sintua ni malim si Kayapas, ai nunga pungu disi angka sibotosurat ro di pangituai. Alai sai mangihut do si Petrus mandaodao sahat ro di alaman ni sintua ni malim i. Laos bongot ma ibana tubagasan, laho hundul tusi rap dohot angka naposo marnida ujungna. Alai anggo angka sintua ni malim ro di sandok rapot godang mangalului panindangion gapgap dompak Jesus, na tuk mambahen Ibana marutang hosa. Alai nang pe hehe torop sitindangi gapgap, ndang adong jumpangsa. Alai parpudi ro ma dua halak, ninna ma: “Didok Halak on: Tarbahen Ahu do mangalohai joro ni Debata jala pajongjong i sumuang di bagasan tolu ari.” Dung i hehe ma sintua ni malim i, mandok tu Ibana: “Ndang alusanmu na hinatindangkonnasida dompak Ho?” Alai sai hohom do anggo Jesus.

10. Marende BE No. 79 : 5

11. Panjahaon Bag. IV

Dung i dipanghulingi sintua ni malim i ma Ibana: “Hupatolon ma Ho tu Debata Siparngolu i, asa dipaboa Ho tu hami, manang na tutu Ho Kristus, Anak ni Debata!” Dung i didok Jesus ma tu ibana: “Songon na nidokmi ma tutu! Alai hudok ma tu hamu: Olat ni on ma idaonmuna Anak ni jolma i, hundul di siamun ni Hagogoon jala ro di atas ombun ni langit.” Gabe diribakkon sintua ni malim ma pangkeanna mandok: “Na mangaleai Debata do Ibana! Pola luluan dope sitindangi? Nunga dibege hamu pangaleaina i! Beha do di rohamu?” Dung i ninna nasida ma mangalusi: “Marutang hosa ma Ibana!” Jadi ditijuri nasida ma bohina, na deba manompuk, na deba mangalinsingi, huhut mandok: “Surirangi hami, Kristus, ise do na mambunu Ho?”

Di toru do anggo si Petrus, di alaman parbagasan, jadi ro ma naposo boruboru ni sintua ni malim i sahalak. Diida ma si Petrus na mansusudu i, gabe dibereng ma ibana, laos didok ma: “Dohot do ho da, dongan ni Jesus na sian Nasaret!” Alai diporso si Petrus do, didok ma: “Ndang adong huboto, jala ndang huantusi na nidokmi!” Laos ruar ma ibana tu alaman jolojolo, jala martahuak ma manuk. Alai marnida ibana, diulahi naposo boruboru i ma mandok tu angka na jongjong disi: “On do sada sian nasida!” Alai mamorso muse anggo ibana. Jadi dung satongkin nari, didok angka na jongjong disi ma muse mandok si Petrus: “A, tongon do; dongannasida do ho, ai halak Galilea do ho!” Gabe dipungka si Petrus ma mambuburahon dirina huhut manolonnolon: “Ndang hutanda jolma na nidokmuna i!” Dung i mamintor martahuak ma manuk i paduahalihon. Jadi diingot si Petrus ma na nidok ni Jesus tu ibana: Tolu hali do soadahononmu Ahu, andorang so martahuak manuk paduahalihon. Jala marningot i, tumatangis ma ibana.

12. Marende BE No. 88 : 2 + 4

13. JAMITA: Jesaya 52 : 7 – 12

IDA MA NA RO DO RAJAM

Apulapul dohot panghirimon, ido na sinoarahon ni Debata marhite Jesaya tu halak Israel na tongon marungkil ala tartaban nasida di tano Babel binahen dosa dohot hatangkangon nasida. Apulapul dohot panghirimon na sinoarahon ni Debata marhite Jesaya tu halak Israel naung mandate roha nasida ala paet ni ngolu na didalani nasida di habuangan i. Dao sian Jerusalem, dao sian bagas joro ni Debata naung malengse binahen ni halak Babel mambahen roha ni bangso i mandate jala mandele. Ndang adong be na laho sibanggahononhon jala ndang adong be sipangasahononhon, asing ni na manjalo ngolu di habuangan i, ido di roha ni bangso i. Ndang adong be panghirimon boi dapot idaon nasida di habuangan i. Gabe naeng tarpedem ma mata partondion nasida maradophon Debata, jala mambahen nasida naeng mangalului haporusan na asing. Ido umbahen disoarahon Debata “ngot ma ho, ngot ma ho!” (Jes. 52:1). Boasa ingkon ngot bangso i?

Parjolo, ala ro do barita na uli tu nasida. Barita na uli na na ringkot jala na pinaimaima ni bangso i laho mangapuli roha nasida. Barita na uli na disoarahon tangkas tu bangso na marungkil. Barita na uli na laho pangoluhon panghirimon di bangso i. Jala dia ma barita na uli tu bangso na marsitaonon i? “DebataM do bangkit Raja”, on do barita na uli i. Debata bangkit Raja patuduhon parhuaso do Debata, jala dipadiri Ibana diriNa gabe raja na laho manguluhon jala manggomgomi bangsoNa. Debata bangkit Raja patuduhon na so tartaluhon do Debata i. Hata i patuduhon tu bangso Israel, ndang na talu Debata maradophon debata bangso na asing i.

Paduahon, ala nunga marpangulahi roha ni ni Jahowa mida bangsoNa. Dosa ni bangso i, ima na mangahalupahon Debata jala na manadinghon Debata i do na mambahen nasida ingkon manaon na paet i (bnd. Jes. 1:2-3). Alai ndang ro di salelenglelengna Debata muruk mida bangsoNa i jala ndang ditadinghon Debata bangsoNa i di parungkilon na salelenglelengna. Marpangulahi do rohaNa mida bangsoNa i jala mulak do Ibana gabe Raja di ngolu ni bangsoNa. Alanii, patut ma marolopolop bangsoNa i.

Hadirion i ma na disoarahon Debata marhite Jesaya laho mangapuli jala mangalehon panghirimon tu bangso Israel uju i jala tu hita angka na pinillitNa di partingkian saonari. Di tongatonga ragam ni panosak ni portibi on dohot di ragam ni parsorion di ngolu on, diapuli jala diapoi Debata do hita asa tongtong marpanghirimon jala marolopolop mandalani ngolunta. Tarlumobi di hamaolon na masa di portibi on nuaeng ima panghorhon ni parsahiton na binahen ni virus on. Hampir sude do jolma mabiar tarlumobi paihutihuthon perkembangan na masa. Alani i, dijouhon Debata do hita:

Parjolo, ida ma, lului ma, jala tiop ma barita na uli. Ndada holan i, asa naeng ma nian hita dohot laho marbarita na uli na laho manungkolnungkoli dohot mangapuli roha ni angka na humaliang hita. Jala dia ma barita na uli na ringkot sibaritahononta? Debata bangkit raja. Marhuaso do Debata laho manaluhon angka na manggosagosa ngolu ni angka na tinompaNa.

Paduahon¸ sai marhaporusan tu Debata ma hita jala unang ma hita humalaput manang gasagasaon. Tetap tenang, i do na ingkon siulahononhon. Didok hata ni Debata do, “Jahowa do marporang humonghop hamu, asal hohom hamu” (2 Musa 14:14). Debata do na manghophop ngolunta jala na mangondingi hita. Asal tangi hita tu soara ni Debata, pamonangonNa do hita.  

14. Marende BE 199 : 1 – 2

15. T A N G I A N G  P A N G O N D I A N O N

16. Marende BE 802 : 1 - ... (Pelean)

17. T A N G I A N G  P A N U T U P: Ale Amanami – Amen, Amen, Amen