Tata acara Partangiangan

PARTORDING NI PARTANGIANGAN KELUARGA

MANOMU MINGGU JUBILATE

1. MARENDE: BE No. 9:1-2
2. TANGIANG PAMUHAI
3. MANJAHA EPISTEL: 1 KRONIKA 16:31-36
4. MARENDE: BE No.190:1-2
5. JAMITA: EPESUS 5:15-21
6. MARENDE: BE No. 443:1-2
7. TANGIANG PANGONDIANON
8. MARENDE: BE No. 562:1-2 (Pelean)
9. TANGIANG ALE AMANAMI-AMEN (3×)

BAHAN JAMITA (EPISTEL MINGGU JUBILATE)
“MAMANGKE TINGKI ASA MANGOLU DI BAGASAN TUHAN I”
(Epesus 5:15-21)

    Adong do sada pandohan di ngolunta on na mandok “time is money”, sada pandohan na laho mangajarhon mansai arga do partingkian ni ngolu na dilehon tu ganup jolma. Alanii, porlu do ganup jolma i marsiajar mamangke ganup tingki na nidalananna asa unang gabe patubuhon panolsolion di pudi ni ari. Mamangke partingkian laho mambahen moment na denggan, ido na porlu binahen ni jolma i di ngoluna. Ala laos holan sahali do partingkian di ngolu on mamolus. Ndang haulahan be tingki molo nunga salpu. Alanii mamangke tingki laho patupahon na denggan, ido na naeng sidohonon ni pandohan i di ngolunta on. Laos ido na naeng ajarhonon ni hata ni Debata marhite surat ni apostel Paulus.
Di hita na hinaholongan ni TUHAN Jesus Kristus,
Songon angka na pinillit ni Debata, digoari do angka na porsea gabe anak hatiuron. Anak hatiuron ima angka pribadi na mananda hatiuron ni Debata jala na ingkon mangolu di bagasan hatiuron ni Debata. Jala songon angka anak hatiuron na mangolu di portibi on, mangolu do angka na porsea i di bagasan pardalanan ni tingki ngolu i. Diigil do nang angka na porsea i marmanat di ngolu dohot di partingkian na jinalona sian Debata. Umbahen i do dipaingot hata ni Debata do angka na porsea marhite turpuk on asa mangargahon ngolu dohot tingki na sahat di ngoluna. Orang percaya hendaknya tidak sembarangan memakai hidup dan waktu yang dimilikinya. Justru diigil do ngolu ni angka na porsea i marlapatan di ganup tingki jala gabe tingki laho mamaritahon lomo ni roha ni Debata.

    Alanii, asa jumpang na sisongon i, naeng ma angka na porsea sai mangalului angka na hinalomohon ni roha ni Debata jala asa lam manggohi dirina marhite Tondi ni Debata. Asa marhite i, ndang gabe maoto angka na porsea marnida dohot mangantusi angka na masa, alai gabe halak na marroha marnida angka na masa di portibi on. Ala porlu do ingoton ni hita angka na porsea, ai di partingkian on sai maotaot do sibolis laho mangalului sibondutonna (bnd. 1 Petr. 5:8). Na tongtong do mangula sibolid laho manjehehon jala manait jolma tarlumobi angka na porsea tu hamagoan. Alanii, asa unang gabe tarlombang tu hamagoan dohot tu hamatean, di partingkian na tadalani naeng ma hita tongtong marsiajar mananda lomo ni roha ni Debata dohot mangolu di bagasan Tondi ni Debata. Termasuk ma di partingkian saonari di na masa parsahiton na binahen ni Covid-19.
Di hita na hinaholonhan ni TUHAN Jesus Kristus, Marhite parsahiton na masa nueng, gabe dilehon do partingkian asa ganup halak mian di bagasna be. Alai aha do na niula di ganup bagas na be nuaeng? Naeng ma partingkian on gabe partingkian di angka na porsea laho patupahon parsaoran keluarga na rosu dohot Debata. Gabe tingki di angka natoras laho mangajari angka ianakhonna taringot tu hata ni Debata, gabe tingki ama manang ina patuduhon hadirionna songon malim di tongatonga keluarga laho manguluhon keluarga di parsaoran dohot Debata. Asa marhite i, lam tang haporseaonta laho mangadopi angka na masa di ngolunta on. 
Amen.